మహాలక్ష్మీ పథకం కింద రూ.500 గ్యాస్ సిలిండర్ తీసుకుంటున్న లబ్ధిదారులకు గుడ్‌న్యూ్స్. ఇక నుంచి రెండ్రోజుల్లోనే రాయితీ సొమ్ము అకౌంట్లలోజమ కానుంది. ఇక సరైన వివరాలు ఇవ్వకుండా
ప్రధానాంశాలు:
రూ.500కే గ్యాస్ సిలిండర్
మరో గుడ్‌న్యూస్ చెప్పిన రేవంత్ సర్కార్
రెండ్రోజుల్లోనే రాయితీ సొమ్ము అకౌంట్లలో జమ
కాంగ్రెస్ ప్రభుత్వం మహాలక్ష్మీ పథకంలో భాగంగా రూ.500కే గ్యాస్ సిలిండర్ అందిస్తున్న విషయం తెలిసిందే. ఆరు గ్యారంటీల అమల్లో భాగంగా రాయితీపై సిలిండర్లు అందిస్తున్నారు. రాష్ట్రవ్యాప్తంగా 1.20 కోట్ల గ్యాస్ కనెక్షన్లు ఉండగా.. రేషన్ కార్డు ఉన్నవారు మాత్రమే రూ.500 గ్యాస్ సిలిండర్ పొందేందుకు అర్హులుగా ప్రభుత్వం నిర్ణయించింది. దీంతో తెలంగాణ వ్యాప్తంగా రేషన్ కార్డులు ఉన్నవారు 89.99 లక్షల మంది ఉన్నారు. ప్రజాపాలన దరఖాస్తుల ద్వారా వీరిలో 91.49 లక్షల మంది రూ.500 గ్యాస్ సిలిండర్ కోసం దరఖాస్తు చేసుకోగా.. తొలుత 39.50 లక్షల కుటుంబాలను అర్హులుగా గుర్తించారు.
ప్రజా పాలన అఫ్లికేషన్లలో సరైన వివరాలు ఇవ్వకపోవటం వంటి కారణాలతో వారికి రాయితీ అందటం లేదు. ప్రతి ఆయిల్‌ కంపెనీ వినియోగదారు సంఖ్యతో పాటు ఒక యూనిక్‌ ఐడీ ఇస్తాయి. ఇందులో 17-19 అంకెలు ముద్రించి ఉంటాయి. అయితే చాలా మంది ప్రజాపాలన దరఖాస్తులో యూనిక్‌ ఐడీ కాకుండా కన్స్యూమర్‌ ఐడీ రాయడంతో రాయితీ అందకుండా పోతుంది. ఈ సంఖ్యను అఫ్లికేషన్ ఫారంలో రాయనివారు ప్రజాపాలన కేంద్రాల్లో తిరిగి మరోసారి సరైన వివరాలు అందిస్తే ప్రభుత్వం అర్హులుగా గుర్తిస్తుంది. ఆధార్‌ నెంబర్ తప్పు రాసినా కూడా సరిచేసుకోవచ్చు. ఇలా 4.60 లక్షల మంది సవరణ చేసుకోగా.. వారందరికీ రూ.500కే గ్యాస్ సిలిండర్ అందుతోంది. దీంతో లబ్ది పొందే మెుత్తం కుటుంబాల సంఖ్య 44.10 లక్షలకు చేరుకుంది.
ఇక గ్యాస్ రాయితీ సొమ్ము లబ్దిదారుల అకౌంట్లలో జమ చేసే విషయంపై కూడా ప్రభుత్వం కీలక నిర్ణయం తీసుకుంది. గతంలో గ్యాస్ తీసుకున్న తర్వాత నాలుగైదు రోజులకు లబ్ధిదారుల అకౌంట్లలో డబ్బులు జమయ్యేవి. ఇక నుంచి రెండు రోజుల్లోనే జమ చేసేందుకు సిద్ధమయ్యారు. ఈ మేరకు సీఎం రేవంత్ అధికారులకు స్పష్టమైన ఆదేశాలు ఇచ్చారు. దీంతో సివిల్ సప్లయ్ శాఖ కమిషనర్‌ డీఎస్‌ చౌహాన్‌ కేంద్ర పెట్రోలియం శాఖ మంత్రి హర్దీప్‌సింగ్‌పురీని కలిశారు. రాష్ట్ర ప్రభుత్వం చెల్లించే రాయితీ సొమ్మును వినియోగదారులకు 48 గంటల్లో అందేలా చూడాలని విజ్ఞప్తి చేశారు. త్వరలోనే లబ్ధిదారులకు రెండు రోజుల్లోనే రాయితీ సొమ్ము జమ కానుంది.
