హైదరాబాద్ పాతబస్తీ కూల్సుంపురా పోలీసు స్టేషన్ పరిధిలో ఘోర అగ్ని ప్రమాదం చోటు చేసుకుంది. సోఫా తయారీ గోదాంలో అగ్ని ప్రమాదం చోటు చేసుకోగా.. నలుగురు తీవ్రంగా గాయపడ్డారు. వీరిలో ఓ చిన్నారి పరిస్థితి విషమంగా ఉన్నట్లు డాక్టర్లు తెలిపారు.
పాతబస్తీలో అగ్ని ప్రమాదం
సోఫా తయారీ కేంద్రంలో మంటలు
చిన్నారి పరిస్థితి విషమం
హైదరాబాద్ పాతబస్తీలో ఘరో అగ్ని ప్రమాదం చోటు చేసుకుంది. కూల్సుంపురా పోలీస్ స్టేషన్ పరిధిలోని వెంకటేశ్వర నగర్‌లోని ఓ సోఫా తయారీ గోదాంలో ఇవాళ తెల్లవారుజామునఒక్కసారిగా మంటలు అంటుకున్నాయి. మూడుంతస్తుల భవనంలో గ్రౌండ్ ఫ్లోర్‌లో సోఫా తయారీ గోదాం ఉంది. ముందుగా సోఫా తయారీ గోదాంలో అంటుకున్న మంటలు చాలా వేంగా మెుదటి అంతస్తుకు వ్యాపించాయి. మెుదటి అంతస్తులో గోదాం నిర్వహిస్తున్న శ్రీనివాస్ కుటుంబం నివాసం ఉంటుంది.
వారి ఇంట్లోనూ సోఫా తయారీ వస్తువులు ఉండటంతో వేగంగా మంటలు వ్యాపించాయి. శ్రీనివాస్‌తో పాటు అతని భార్య నాగమణి, ఇద్దరు కుమార్తెలు హరిణి, శివ ప్రియ బయటకు రాలేక అందులోనే ఇరుక్కుపోయారు. స్థానికులు అక్కడకు చేరుకొని ఫైర్ సిబ్బందికి సమాచారం అందించారు. రెండు గంటలు శ్రమించి అగ్నిమాపక సిబ్బంది మంటల్ని అదుపులోకి తీసుకొచ్చారు. రెండు, మూడో ఫ్లో్ర్‌లో దాదాపు 20 మంది ఉండగా.. వారిని సురక్షితంగా బయటకు తీశారు. పెద్ద పెద్ద నిచ్చెనలు, స్థానిక యువత సాయంతో వారిని సురక్షితంగా కిందకు తీసుకొచ్చారు. అయితే మెదటి అంతస్తులో ఉన్న శ్రీనివాస్ కుటుంబంలో అందరికీ గాయాలు కాగా.. వారిని ఉస్మానియా ఆసుపత్రికి తరలించారు. ప్రస్తుతం వారికి అక్కడ చికిత్స అందుతోంది. వీరిలో శివ ప్రియ (10) పరిస్థతి విషమంగా ఉన్నట్లు డాక్టర్లు వెల్లడించారు.
అయితే ఈ అగ్ని ప్రమాదంపై పలు అనుమానాలు తలెత్తుతున్నాయి. ఎవరైనా కావాలనే నిప్పంటించారా లేక షార్ట్ సర్క్యూట్ కారణంగా మంటలు చెలరేగి ఉంటాయా అనే కోణంలో పోలీసులు ఆరా తీస్తున్నారు. ఘటనపై కేసు నమోదు చేసుకుని విచారణ చేపట్టారు. అక్కడకు చేరుకున్న అగ్ని మాపక శాఖ ఉన్నతాధికారులు సైతం పరిస్థితిని సమీక్షించారు. ఇక ఈ అగ్ని ప్రమాదంతో స్థానిక ప్రజలు భయాందోళనలకు గురయ్యారు. ఇండ్లు పక్క పక్కనే ఉండటంతో ఎక్కడ మంటలు వ్యాపిస్తాయోనని భయపడిపోయారు. దట్టమైన పొగతో వారు ఉక్కిరి బిక్కిరయ్యారు. కొందరు అస్వస్థకు గురయ్యారు. భయంతో కొందరు స్థానికులు ఇళ్ల నుంచి బయటకు పరుగులు తీశారు.
