ఊటీ, కొడైకెనాల్, సిమ్లా, కులుమనాలి, కాశ్మీర్…. ఈ పేర్లు చెబితేనే మనసు ఆహ్లాదంతో పరవశించిపోతుంది. చల్లని వాతావరణం, పచ్చని పరిసరాలు, ఎత్తైన కొండలు, లోతైన లోయలు… ఇలా అక్కడి ప్రకృతి అందాలు చూస్తే కవి కాని వాడికికూడా కవిత్వం తన్నుకొస్తుంది. అయితే ఇప్పుడు అలాంటి ప్రకృతి సోయగమే మన ఏపీలో కనువిందు చేస్తోంది. ప్రకృతి ప్రేమికులను రారమ్మంటోంది.
కళ్లు తిప్పుకోనివ్వని అందం.. ఎటు చూసినా ప్రకృతి రమణీయం.. ఔరా అనిపించే ఆహ్లాదకర వాతావరణం.. ప్రకృతి ప్రేమికుల్లో అంతులేని ఆనందం.. ఎక్కడో డార్జిలింగ్, నైనిటాల్, ముస్సొరినో అనుకుంటున్నారా…! కానే కాదు… పక్కా ఆంధ్రా. విదేశాలకు ఏమాత్రం తీసిపోని అందాలతో పాటు, గ్రామీణ గిరిజన సంస్కృతికి సజీవ సాక్ష్యంగా, ప్రకృతి ఒడిలో విరిసిన అందాల హరివిల్లు మన అరకులోనే ఈ అద్భుత దృశ్యాలు. సీజన్ మొదలుకావడంతో అరకు అందమైన ప్రపంచాన్ని ఆవిష్కరించింది.
అరకు లోయతో పాటు లంబసింగి, వంజంగిలోని ఈ మేఘాల కొండలు మైమరిపిస్తున్నాయి. ఆకాశమే దిగివచ్చిందా అన్నట్లు ఈ అద్భుత దృశ్యాలు ఔరా అనిపిస్తున్నాయి. అరకులో ఉన్నామా… ఆకాశంలో విహరిస్తున్నామా అన్న అనుమానాలు కలిగిస్తున్నాయి. ప్రకృతి రమణీయతకు గిరిజన సంప్రదాయ నృత్యాలు మరింత అందాన్ని అద్దాయి. పైనా మంచు వర్షం… కొండపైన అబ్బురపరిచే నృత్యాలను చూస్తూ పులకించిపోయారు పర్యాటకులు.
అరకు అందాలు అద్భుతమంటున్నారు టూరిస్టులు. సుందర దృశ్యాలకు చూసేందుకు రెండు కళ్లు చాలట్లేదంటున్నారు. తెలుగు రాష్ట్రాల నుంచే కాదు… పశ్చిమబెంగాల్, తమిళనాడు, మహారాష్ట్ర నుంచి వచ్చిన పర్యాటకులు. ప్రకృతి అందాలు చూసి పరవశించిపోతున్నారు. ఇక ఈ పర్యాటక సీజన్ 6 నెలల పాటు ఉంటుంది. అరకులో ఏర్పాట్లు కూడా అదిరిపోతున్నాయి. టూరిస్ట్ సీజన్ కావడంతో సకల సౌకర్యాలు అక్కడ దొరుకుతున్నాయి. మొత్తంగా… ఈ ప్రకృతి వలకబోతున్న అందాలను చూస్తుంటే మన డైరెక్టర్లు సినిమా షూటింగ్‌కు ఎక్కడికో వెళ్లాల్సిన అవసరం లేదనిపిస్తోంది…!
