ఆంధ్రప్రదేశ్‌లో వీలున్నన్ని ఎక్కువ మహిళా వసతి గృహాలను అందుబాటులోకి తేవాలని ముఖ్యమంత్రి చంద్రబాబు
ప్రధానాంశాలు:
ఏపీలో మహిళలకు శుభవార్త
రాష్ట్రంలో మహిళలకు హాస్టల్స్
కీలక ప్రకటన చేసిన చంద్రబాబు
ఆంధ్రప్రదేశ్ ముఖ్యమంత్రి నారా చంద్రబాబు నాయుడు మహిళలకు శుభవార్త చెప్పారు. రాష్ట్రవ్యాప్తంగా వీలున్నన్ని మహిళా వసతి గృహాలను అందుబాటులోకి తేవాలని ఆదేశించారు. రాష్ట్రంలో ఉద్యోగినుల కోసం అవసరమైన ప్రతిచోటా మహిళా హాస్టల్స్ ఏర్పాటు చేయాలని అధికారులకు సూచించారు. సచివాలయంలో మహిళాశిశు సంక్షేమశాఖపై ముఖ్యమంత్రి అధికారులతో సమీక్ష నిర్వహించారు.. పలు కీలక అంశాలపై చర్చించారు. రాష్ట్రంలోని జిల్లా కేంద్రాలు, కార్పొరేషన్‌ స్థాయిలో 100 హాస్టల్స్ ఏర్పాటు చేసేందుకు చర్యలు తీసుకుంటున్నామని అధికారులు సీఎంకు వివరించారు. అయితే ఉద్యోగినుల సంఖ్యను బట్టి అవసరమైతే డివిజన్ స్థాయిలో హాస్టల్స్ ఏర్పాటు చేయాలన్నారు. వసతి గృహాల దగ్గర చిన్నారుల సంరక్షణ కేంద్రాలు ఉండేలా చూడాలని.. ప్రభుత్వ, ప్రైవేటు భాగస్వామ్యంతో వాటి నిర్వహణను ముందుకు తీసుకెళ్లాలని చంద్రబాబు సూచనలు చేశారు.
మహిళా వసతిగృహ భవనాలను ముందుగా ప్రభుత్వమే అద్దెకు తీసుకుని నిర్వహిస్తుంది. ప్రభుత్వ, ప్రైవేటు భాగస్వామంతో.. లేని పక్షంలో స్వచ్ఛంద సంస్థల సహకారంతో వీటిని కొనసాగించనున్నారు. ఈ హాస్టల్స్‌కు సంబంధించి నివేదికను సిద్ధం చేయాలని అధికారుల్ని ముఖ్యమంత్రి ఆదేశించారు. రాష్ట్రవ్యాప్తంగా ఉన్న మినీ అంగన్వాడీ కేంద్రాలపై సమీక్ష చేశారు. గిరిజన ప్రాంతాల్లో ఎస్సీ జనాభా అధికంగా ఉన్నచోట అంగన్వాడీ కేంద్రాలను అప్‌గ్రేడ్ చేయాలని సూచించారు. అవసరమైతే దాతల ద్వారా అంగన్వాడీ కేంద్రాలను అభివృద్ధి చేసేందుకు మేము సైతం కార్యక్రమాన్ని తిరిగి అమలుచేయాలని ముఖ్యమంత్రి అధికారుల్ని ఆదేశించారు.
గర్భిణులు, బాలింతలకు అమలవుతున్న పథకాలతో పాటుగా పిల్లలకు అందించే పౌష్టికాహార పథకాలపై ముఖ్యమంత్రి ఆరా తీశారు. గత టీడీపీ ప్రభుత్వ హయాంలో అమలు చేసిన ప్రవేశపెట్టిన బాలామృతం, అమృతహస్తం, బాల సంజీవని, గోరుముద్ద, గిరి గోరుముద్ద వంటి పథకాలపై సమీక్ష చేశారు. అంగన్వాడీ కేంద్రాలు, మిషన్‌ వాత్సల్య, మహిళా సాధికారత, మాతా, శిశు మరణాల నియంత్రణ కింద చేపట్టే చైల్డ్‌ ప్రొటెక్షన్‌ కార్యక్రమాలపై అధికారులతో చంద్రబాబు చర్చించారు. మొత్తానికి ప్రభుత్వం తీసుకున్న హాస్టల్స్ ఏర్పాటు నిర్ణయంపై ప్రశంసలు వస్తున్నాయి. ప్రభుత్వ ఆధ్వర్యంలో వీటిని నిర్వహిస్తే బావుంటుందనే అభిప్రాయాలు కూడా వ్యక్తమవుతున్నాయి.
